प्रकाश ढकाल
पोखरा, १० जेठ ।
मंगलबारसम्म पोखरा लेखनाथ महानगरपालिकाको करिब ६० प्रतिशत मतगणना सकिएको छ । ३३ वडा रहेको महानगरमा १ सातासम्म मुश्किलले २० वडाको गणना सकियो । प्राप्त नतिजा अनुसार महानगरको प्रमुख र उपप्रमुख पदमा एमाले उम्मेदवार निकै अगाडी पुगिसकेका छन् । गणना सुरु भएदेखि नै अगाडी रहेको एमालेले पछिल्ला वडाहरुबाट मतान्तर धेरै फरक पारिसकेको छ । मेयर पदमा एमालेका मान बहादुर जिसी नजिकका प्रतिश्पर्धी भन्दा ६ हजार बढी मतले अगाडी छन् । २० वडासम्म जिसीले ३३ हजार २ सय ३७ मत पाएका छन् भने निकटतम प्रतिश्पर्धी काँग्रेस उम्मेदवार रामजी कुवँरले २७ हजार २ सय ७६ मतका साथ पछ्याईरहेका छन् । त्यसपछिको लाईनमा छन्, संघीय समाजबादी पार्टीका उम्मेदवार हुम तमु र राप्रपाकी उम्मेदवार गीता गुरुङ । तमुको २ हजार २ सय २ मत छ भने गुरुङले १ हजार ७ सय १७ मत पाएकी छन् ।
उपमेयरमा पनि एमाले उम्मेदवार मञ्जुदेवी गुरुङले ६ हजार बढी मतले अग्रता लिएकी छिन् । निकटतम प्रतिद्धन्द्धी सरस्वति गुरुङलाई पछि पार्दै उनले २० वटा वडाबाट ३१ हजार ७ सय ७० मत पाईन् । काँग्रेसबाट उम्मेदवार बनेकी सरस्वतीको २५ हजार ७ सय ५८ मत छ । माओबादी केन्द्रकी गोमा ढकाल, राप्रपाका रमेश खत्री, स्वतन्त्र उम्मेदवार सिरोज कोइराला र नयाँ शक्ति पार्टीकी लक्ष्मी खाती क्रमश पछाडी छन् । ढकालले हालसम्म ४ हजार २ सय ४४ मत ल्याएकी छिन् भने खत्रीको भागमा २ हजार १ सय ९३ मत छ । स्वतन्त्र रुपमा उम्मेदवारी दिएका कोइरालाले उपप्रमुखका दावेदार ६ जनालाई पछि पार्दै पाँचौं बनेका छन् । उनले हालसम्म १ हजार ७ सय ६० मत पाए भने नयाँ शक्ति पार्टीकी खातीले ८ सय ३८ मत पाएकी छिन् । ३१ बैशाखको चुनाव पछि जेठ १ गतेदेखि गणना थालिएको हो । यद्यपी वडा नम्बर १७ मा फरक प्रकृतिको स्वस्तिक छाप भेटिएपछि दुईदिन गणना हुन सकेन । महानगरमा अहिलेसम्म २७ हजार ५ सय ९१ मत बदर भएको छ ।
वडातहमा पनि एमालेको उपस्थिती बलियो बन्दै गएको छ । मतगणना भएका वडामध्ये बहुमत वडाहरु एमालेको पकडमा छ । एमालेले १२ वडामा जित्दा काँग्रेस मुश्किलले ८ वडामा बिजयी भएको छ । मंगलबार मतगणना भएका सबै वडामा एमालेको प्यानल बिजयी भयो । महानगरको १७ नम्बर वडाको अध्यक्षमा एमालेका उम्मेदवार तीर्थराज अधिकारीले काँग्रेसका उम्मेदवार पुण्डरी प्रसाद बराललाई १ हजार २ सय ६३ मतान्तरले पराजीत गरे । अधिकारीको ३ हजार ४६ मत आउँदा बरालले १ हजार ७ सय ६३ मत मात्रै पाए । वडा सदस्यमा खुलातर्फ बैकुण्ठ भण्डारी र शान्तादेवी गुरुङ, महिला सदस्यमा राधिका कुमारी शाही तथा दलित महिला सदस्यमा तारा परियार बिजयी भएका छन् ।
वडा नम्बर १८ मा पनि नेकपा एमालेको प्यानल बिजयी भएको छ । वडाध्यक्षमा रण बहादुर थापाले निकटतम प्रतिद्धन्द्धी काँग्रेसका उम्मेदवार भरत बहादुर थापालाई ७ सय ८ मतान्तरले पराजीत गरे । रणबहादुरको १ हजार ६ सय ७९ मत आउँदा भरतले ९ सय ७१ म्त पाए । महिला सदस्यमा भोजकुमारी थापा, दलित महिला सदस्यमा सरला नेपाली, खुल्ला सदस्यमा हरी लम्साल र ज्ञान बहादुर थापा बिजयी भएका छन् ।
१९ नम्बर वडामा एमालेका शोभामोहन पौडेल वडाध्यक्षमा बिजयी भए । पौडेलले निकटतम प्रतिद्धन्दी नेपाली काग्रेसका उमेद्वार पुष्पेन्द्र पाण्डेलाई ५ सय २३ मतले हराए । पौडेलको २ हजार ४ सय २३ मत आउँदा पाण्डेले १ हजार ९ सय ६० मत मात्रै पाए । खुला सदस्यमा कोमल प्रसाद शर्मा बास्तोला, कृष्ण प्रसाद गौतम, महिला सदस्यमा कोपिला केसी र दलित महिला सदस्यमा तारा नेपालीले जित हात पारिन् ।
वडा नम्बर २० को वडाध्यक्षमा एमाले उम्मेदवार सिम गुरुङ बिजयी भएका छन् । गुरुङले काँग्रेसका उम्मेदवार महेन्द्र अधिकारीलाई ५ सय ९२ मतान्तरले पराजीत गरेका हुन् । गुरुङको १ सय २ सय २३ मत आउँदा अधिकारीले ६ सय ३१ मत मात्रै पाए । वडा सदस्यमा पनि एमालेको प्यानल बिजयी भएको छ । खुला सदस्य तर्फ भीम प्रसाद बास्तोला, मोती प्रसाद पौडेल, महिला सदस्यमा लक्ष्मीदेवी सुवेदी र दलित महिला सदस्यमा मन्बुजा विक बिजयी भईन् । २१ देखि २५ नम्बर वडासम्मको मतगणना चलिरहेको छ ।

१ देखि २० नम्बर वडासम्मको मतपरिणाम