लस एन्जलस, क्यालिफोर्निया। श्री पशुपतिनाथ तथा बुद्ध मन्दिर, लस एन्जलसमा आयोजित श्रीमद्भागवत महापुराण सप्ताह ज्ञान महायज्ञको पहिलो दिन भव्य रूपमा सम्पन्न भएको छ। प्रसिद्ध श्रीमद्भागवत कथावाचिका राधिका दासी ज्यू को मुखारविन्दबाट प्रारम्भ भएको महायज्ञमा स्थानीय नेपाली समुदाय, विभिन्न धार्मिक संघसंस्था तथा भक्तजनहरूको उल्लेखनीय सहभागिता रहेको थियो।महायज्ञको उद्घाटन समारोह अत्यन्त श्रद्धा, भक्ति र उत्साहका साथ सम्पन्न भएको आयोजक श्री पशुपतिनाथ फाउन्डेशन, अमेरिका ले जनाएको छ। भजन–कीर्तन, वैदिक मन्त्रोच्चारण तथा धार्मिक अनुष्ठानका बीच सुरु भएको कार्यक्रममा भक्तजनहरूको उल्लेखनीय उपस्थितिले मन्दिर परिसर भरिभराउ बनेको थियो।

आयोजकका अनुसार महायज्ञको पहिलो दिनमै १ लाख ४२ हजार ४७६ अमेरिकी डलर (US$142,476) दान तथा सहयोग रकम संकलन भएको छ। यो रकम मन्दिरको धार्मिक, सांस्कृतिक तथा सामुदायिक गतिविधिहरूको विस्तारमा उपयोग गरिने बताइएको छ। कार्यक्रममा बोल्दै विभिन्न वक्ताहरूले विदेशमा बसेर पनि नेपाली भाषा, धर्म, संस्कृति र परम्पराको संरक्षण तथा प्रवर्द्धनमा यस्ता धार्मिक कार्यक्रमहरूको महत्वपूर्ण भूमिका रहने बताएका थिए। उनीहरूले नेपाली समुदायलाई एकताबद्ध बनाउने माध्यमका रूपमा महायज्ञलाई लिएका छन्।आगामी दिनहरूमा पनि कथा प्रवचन, भजन–कीर्तन, आध्यात्मिक प्रवचन तथा विशेष धार्मिक कार्यक्रमहरू निरन्तर सञ्चालन हुने आयोजकले जनाएको छ। महायज्ञ आगामी केही दिनसम्म सञ्चालन हुने भएकाले भक्तजनहरूलाई सहभागी भई आध्यात्मिक लाभ लिन अनुरोध गरिएको छ।